Mark 1

Jono wayí̵ numeaia wago wáí̵ urɨŋí̵ nánɨrɨnɨ.

1Xwɨyí̵á iwamí̵ó Gorɨxomɨ xewaxo Jisasɨ Kiraiso —O nene yeáyí̵ neayimɨxemeaní̵a nánɨ Gorɨxo rí̵peaŋorɨnɨ. O nánɨ xwɨyí̵á yayí̵ seainɨpaxí̵pɨ rɨpɨrɨnɨ. 2Eŋíná Jono wayí̵ nɨneameaia wago sɨnɨ meŋáná xwɨyí̵á Gorɨxoyá wí̵á rókiamoagí̵ Aisaiaoyɨ rɨnɨŋo Jono ná rí̵wí̵yo bɨní̵o nánɨ Gorɨxo xegí̵ xewaxomɨ urɨŋí̵ rɨpɨ rí̵wamɨŋí̵ eaŋɨnigɨnɨ, “Arí̵á eɨ. Gorɨxonɨ gí̵ xwɨyí̵á yaŋí̵ wiowárɨmí̵áo joxɨ gí̵ íwoxɨ xámɨ rɨmeanɨ nánɨ urowárɨmí̵árɨnɨ. O joxɨ nánɨ óí̵ simoiní̵árɨnɨ. 3O nurɨ ámá nánɨ dɨŋí̵ meaŋe nɨŋwearí̵ná joxɨ nánɨ rí̵aiwá re rɨní̵árɨnɨ, ‘Ámɨná rí̵wí̵yo bɨní̵o nánɨ segí̵ dɨŋí̵ óí̵ naŋí̵nɨŋí̵ nɨwimoiro ŋweáí̵rɨxɨnɨ. Óí̵ píránɨŋí̵ imoarɨgí̵ápánɨŋí̵ segí̵ dɨŋí̵ píránɨŋí̵ nimónɨro ŋweáí̵rɨxɨnɨ.’ Gí̵ xwɨyí̵á yaŋí̵ wiowárɨmí̵áo rí̵aiwá e rɨní̵árɨnɨ.” Gorɨxo e rɨŋí̵pa 4Jono wayí̵ nɨneameaia wago ámá nánɨ dɨŋí̵ meaŋe nɨre'morɨ wáí̵ nurɨmerɨ re uragí̵rɨnɨ, “Gorɨxo seyí̵ne' í̵wí̵ niga warɨgí̵ápɨ yokwarɨmí̵ seaiinɨ nánɨ segí̵ uyí̵nií̵ yarɨgí̵ápɨ rí̵wí̵mɨnɨ nɨmamoro nɨsanɨro ŋweápoyɨ. E nerí̵náyí̵, wayí̵ seameaimí̵ɨnɨ.” urarí̵ná 5ámá obaxí̵ Judayí̵yá aŋí̵yo dáŋí̵yí̵ tí̵nɨ áwɨnɨ e wigí̵ aŋí̵ xwe' bɨ xegí̵ yoí̵ Jerusaremɨ dáŋí̵yí̵ tí̵nɨ Jono tí̵ŋí̵ e nánɨ nuro wigí̵ í̵wí̵ niga warɨgí̵ápɨ nánɨ waropárí̵ wíáná iniɨgí̵ Jodanɨ rapáyo wayí̵ umeaiagí̵rɨnɨ. 6O Gorɨxoyá xwɨyí̵á yaŋí̵ wiowárɨŋo aiwɨ seáyɨ e nerɨ weyí̵ menagomanɨ. Rapɨrapí̵ awiaxí̵ yínagomanɨ. Kamerí̵ —Ayí̵ osí̵nɨŋí̵ imónɨŋí̵rɨnɨ. Kamerí̵ í̵á aga iyí̵ánɨŋí̵ imónɨŋí̵ nɨyínɨmáná arerɨxí̵ agwoŋí̵nɨŋí̵ írɨŋí̵yo nɨyínɨrɨ emeagorɨnɨ. Aiwá enɨ awiaxí̵ nagomanɨ. Xópe' tí̵nɨ pí̵kí̵ iniɨgí̵ tí̵nɨ nagorɨnɨ. 7O Jisaso, rí̵wí̵yo bɨní̵o nánɨ wáí̵ nemerí̵ná wauní̵ xwɨyí̵á re ragí̵rɨnɨ, “Nionɨ eŋí̵ eánɨŋáonɨ aiwɨ eŋí̵ eánɨŋí̵ nionɨyá tí̵nɨ rí̵wí̵yo bɨní̵oyá tí̵nɨ xɨxenɨmanɨ. Oyá nɨmu'ronɨ. Omɨŋí̵ wiiarɨgí̵áyí̵ ananɨ wigí̵ bosoyá sɨkwí̵ su' gwí̵ wíkweaiarɨgí̵árɨnɨ. E nerɨ aiwɨ nionɨ sɨmaŋwí̵yónɨŋí̵ yeáyí̵ nurí̵nɨrɨ o aga seáyɨ e'mɨ nɨmu'rónɨŋagɨ nánɨ oyá sɨkwí̵ su' gwí̵ wíkweaipaxí̵ menɨnɨ.” nurɨrɨ 8re uragí̵rɨnɨ, “Nionɨ wayí̵ nɨseameairí̵ná sa iniɨgí̵ tí̵nɨnɨ igí̵á seaeaarɨŋárɨnɨ. Rí̵wí̵yo bɨní̵o wayí̵ nɨseameairí̵ná kwíyí̵ Gorɨxoyápɨ tí̵nɨ seainí̵árɨnɨ.” urɨŋɨnigɨnɨ.

Wayí̵ umeaiŋí̵ nánɨrɨnɨ.

9Jono wáí̵ urarí̵ná Jisaso Gariri pɨropenɨsí̵yo xegí̵ aŋí̵ Nasaretɨ ŋweaŋe pí̵nɨ nɨwiárɨmɨ nurɨ Jonomɨ wímeááná iniɨgí̵ Jodanɨ rapáyo wayí̵ numeairɨ 10wenɨŋí̵ e'í̵yí̵ wɨnɨŋɨnigɨnɨ. Jisaso iniɨgí̵yo dánɨ nímɨnɨmeámɨ yarí̵ná aŋí̵namɨ dánɨ óí̵ iní̵agɨ kwíyí̵ Gorɨxoyá xawiówí̵nɨŋí̵ xí̵o nánɨ weaparɨŋagɨ wɨnɨŋɨnigɨnɨ. 11Sɨnɨ e wɨnarí̵ná Gorɨxo aŋí̵namɨ dánɨ Jisasomɨ re urarɨŋagɨ arí̵á wiŋɨnigɨnɨ, “Gí̵ íwí̵ dɨŋí̵ sɨxí̵ rɨyiŋáoxɨ nánɨ aga yayí̵ seáyɨ e ninarɨnɨ.” urarɨŋagɨ arí̵á nɨwimáná eŋáná 12Gorɨxoyá kwíyí̵ Jisasomɨ rɨxa ámá nánɨ dɨŋí̵ meaŋe nánɨ nɨme'ra nurɨ 13o e ŋweaŋáná sí̵á 40 nóra warí̵ná Seteno —O imí̵óyo xɨráónɨŋí̵ imónɨŋagɨ nánɨ ní̵nɨ sɨmaŋwí̵yónɨŋí̵ wurí̵nɨgí̵orɨnɨ. O nɨbɨrɨ Jisaso xanoyá maŋí̵ pí̵rí̵ owiaíkinɨrɨ iwamí̵ó wíwapɨyarɨŋagɨ aí o í̵wí̵ wí me' sí̵nɨ tí̵ŋí̵ e nɨŋwearí̵ná aŋí̵nají̵ nɨwímearo sɨmɨŋí̵ wínagí̵árɨnɨ.

Ámá wau' wau' awamɨ “Nɨxí̵dí̵poyɨ.” urɨŋí̵ nánɨrɨnɨ.

14Rí̵we'ná Jisaso, Jono rɨxa gwí̵ ŋweaŋáná, o Gariri pɨropenɨsí̵yómɨnɨ nurɨ xwɨyí̵á yayí̵ winɨpaxí̵ Gorɨxo xí̵o xegí̵ xwioxí̵yo mɨmeámí̵ nerɨ píránɨŋí̵ umeŋweaní̵ápɨ nánɨ wáí̵ nurɨmerɨ 15repɨyí̵ re wiemeŋɨnigɨnɨ, “Rɨxarɨnɨ. Gorɨxo seyí̵ne' xwioxí̵yo mɨmeámí̵ nerɨ píránɨŋí̵ seameŋweaní̵ápɨ sɨŋánɨ imónɨnɨ aŋwɨ ayo eŋagɨ nánɨ segí̵ í̵wí̵ yarɨgí̵ápɨ rí̵wí̵mɨnɨ nɨmamoro xwɨyí̵á yayí̵ seainɨpaxí̵ nionɨ seararɨŋá rɨpɨ dɨŋí̵ nɨkwí̵roro ŋweáí̵rɨxɨnɨ.” nurɨmerɨ 16ipí xegí̵ yoí̵ Gariri rɨwoŋí̵pámɨ nɨpurí̵ná ámá peyí̵ nánɨ yarɨgí̵á wau' Saimono tí̵nɨ xogwáo Adɨruo tí̵nɨ peyí̵ nánɨ ubení̵ ipíyo mamówárarɨŋagí̵i nɨwɨnɨrɨ nɨwímearɨ 17re urɨŋɨnigɨnɨ, “Agwiagwí omɨŋí̵ peyí̵ nánɨ yarɨgí̵í rɨpɨ pí̵nɨ nɨwiárɨmɨ nɨxí̵dí̵piyɨ. Omɨŋí̵ xegí̵ bɨ peyí̵ meaayarɨgí̵ípa ámá enɨ axí̵pɨ e meapɨsi oeaíwapɨyimɨnɨ.” uráná 18agwiau' re egí̵isixɨnɨ. Rɨxa peyí̵ nánɨ yarɨgí̵ípɨ pí̵nɨ nɨwiárɨmɨ nu'mɨ ugí̵isixɨnɨ. 19Nu'mɨ warí̵ná Jisaso sɨnɨ ná jí̵e onɨmiápɨ nurí̵ná ámɨ ámá wau', Sebediomɨ xewaxowau' Jemiso tí̵nɨ xogwáo Jono tí̵nɨ ewe'yo nɨŋweámáná egí̵ ubení̵ peyí̵ nánɨ yarɨgí̵íu' arí̵kínɨŋagɨ yadɨrɨpí̵narɨŋagí̵i nɨwɨnɨrɨ 20rɨxa “Agwiagwí enɨ nɨxí̵dí̵piyɨ.” uráná agwiau' xano tí̵nɨ o xegí̵ ámá nɨgwí̵ omɨŋí̵ wiiarɨgí̵á tí̵nɨ sɨnɨ ewe'yo ŋweaŋáná pí̵nɨ nɨwiárɨmɨ omɨ nu'mɨ ugí̵isixɨnɨ.

Imí̵ó dɨŋí̵ xɨxe'roarɨŋí̵ womɨ mɨxí̵ umáɨnɨŋí̵ nánɨrɨnɨ.

21Jisaso wirɨmeáróí̵wa tí̵nɨ nurɨ aŋí̵ yoí̵ Kapaneamɨyo nɨre'moro rɨxa Sabarí̵á —Sí̵á ayi Judayí̵ omɨŋí̵ wí me' kikií̵á nero xwɨyí̵á Gorɨxoyá arí̵á wianɨro nánɨ awí eánarɨgí̵áyirɨnɨ. Sí̵á ayi imónáná rotu' aŋí̵yo nɨpáwiro o ámáyo ure'wapɨyarí̵ná 22ayí̵ Gorɨxoyá ŋwí̵ ikaxí̵ eánɨŋí̵pɨ mewegí̵áwa ure'wapɨyarɨgí̵ápa mure'wapɨyí aga Gorɨxoyá ŋwí̵ ikaxí̵ eánɨŋí̵pɨ xiáwónɨŋí̵ rarɨŋagɨ nɨwɨnɨro o ure'wapɨyarɨŋí̵pɨ nánɨ mɨŋí̵ sí̵ŋá nɨweánɨro yarí̵ná 23íná ámá imí̵ó dɨŋí̵ xɨxe'roarɨŋí̵ wo rotu' aŋí̵yo ínɨmɨ dánɨ makɨrí̵wí̵ nɨmorɨ 24xwamiání̵ re urɨŋɨnigɨnɨ, “Nasaretɨ dáŋí̵ Jisasoxɨ imí̵one pí neaimɨnɨrɨ barɨŋɨnɨ? ‘Xwɨrí̵á neaikɨxe'mɨnɨrɨ rí̵a barɨŋɨnɨ?’ nimónarɨnɨ. Nionɨ nɨjí̵árɨnɨ. Joxɨ Gorɨxo xewaxoxɨ xí̵o rɨrí̵peaŋoxɨrɨnɨ.” uráná 25Jisaso mɨxí̵ numáɨnɨrɨ re urɨŋɨnigɨnɨ, “Pí̵nɨ wiáreɨ! Dɨŋí̵ xɨxe'roarɨŋí̵pɨxɨnɨ nɨwáramómɨ uɨ!” uráná 26imí̵o ámáomɨ meaŋí̵ neaárɨrɨ o sinapɨxwí̵ní̵ nerɨ weŋáná imí̵o nurí̵ná makɨrí̵wí̵ nɨmómɨ uŋɨnigɨnɨ. 27Makɨrí̵wí̵ nɨmómɨ u'agɨ ámá ní̵nɨ sɨŋwí̵ e nɨwɨnɨro mɨŋí̵ sí̵ŋá nɨweánɨro xwɨyí̵á nɨrɨga nuro re rɨnɨgí̵awixɨnɨ, “Xwɨyí̵á apimɨ xiáwónɨŋí̵ neare'wapɨyarɨŋí̵pɨ xegí̵ bɨrɨnɨ. Eŋíná arí̵á wiagwámanɨ. Aga sɨnɨ sɨŋí̵ aí arí̵á wiarɨŋwɨnɨ. Imí̵ó aí sekaxí̵ uráná arí̵á wiarɨŋoɨ.” rɨní̵agí̵a 28xwɨyí̵á Jisaso e'í̵pɨ nánɨ Gariri pɨropenɨsí̵yo rɨxa yaní̵ amɨ amɨ niwe'a uŋɨnigɨnɨ.

Sɨmɨxí̵ obaxí̵yo naŋí̵ imɨmɨxɨmí̵ eŋí̵ nánɨrɨnɨ.

29Jisaso rotu' aŋí̵yo pí̵nɨ nɨwiárɨmɨ nɨpeyearɨ nurɨ aŋí̵ Saimonoyá tí̵nɨ Adɨruoyá tí̵nɨ xɨráxogwáowau'yá aŋí̵yo nɨpáwiro Jemiso tí̵nɨ xogwáo Jono tí̵nɨ enɨ nawínɨ páwíáná 30Saimonomɨ xɨneagwí wará rí̵á pɨrí̵ wiarɨŋagɨ nánɨ sá weŋagɨ Jisasomɨ rɨxa áwaŋí̵ urí̵agí̵a 31o í weŋe nánɨ nurɨ we'yo í̵á meááná sɨmɨxí̵ rɨxa pí̵nɨ wiárí̵agɨ í nɨwiápí̵nɨmearɨ rɨxa aiwá rí̵á nɨyearɨ tɨnɨŋí̵pɨ nɨmearɨ mɨnɨ nɨwia uŋɨnigɨnɨ.

32Rɨxa sí̵á sisisaŋí̵ imónarí̵ná sogwí̵ rɨxa we'í̵mɨ eŋáná ámá aŋí̵ apimɨ dáŋí̵ sɨmɨxí̵ yarɨgí̵áyí̵ tí̵nɨ imí̵ó dɨŋí̵ xɨxe'roarɨŋí̵yí̵ tí̵nɨ nɨmeámɨ Jisaso tí̵ŋí̵ e nánɨ nɨbɨro 33rɨxa oxí̵ apɨxí̵ niaíwí̵ aŋí̵ apimɨ dáŋí̵yí̵ aŋí̵ Jisaso ŋweaŋiwámɨ í̵wí e awí eaárɨnarí̵ná 34o ámá pí pí sɨmɨxí̵ yarɨgí̵áyo naŋí̵ imɨxowárɨrɨ ámá imí̵ó sayá nɨmerɨ xɨxe'roarɨŋí̵yo enɨ imí̵ó mɨxí̵ umáɨnowárɨrɨ nerí̵ná imí̵ó o Gorɨxo xewaxo eŋagɨ nɨjí̵á imónɨŋagí̵a nánɨ mɨxí̵ numáɨnowárɨrí̵ná xwɨyí̵á wí orí̵poyɨnɨrɨ sɨŋwí̵ mɨwɨnɨpa eŋɨnigɨnɨ.

Jisaso Gariri pɨropenɨsí̵yo emeŋí̵ nánɨrɨnɨ.

35O wí̵á mónɨŋí̵mɨ sɨnɨ sí̵á xaíwí̵ yinɨŋáná nɨwiápí̵nɨmearɨ nɨpeyeámáná ámá mɨŋweagí̵e nánɨ nurɨ e Gorɨxomɨ xwɨyí̵á rɨrɨmí̵ nɨwirɨ ŋweaŋáná 36Saimono tí̵nɨ nɨkumɨxɨnɨrɨ emearɨgí̵áwa tí̵nɨ Jisaso sɨnɨ aŋí̵yo mɨŋweaŋagɨ nɨwɨnɨro o nánɨ pí̵á ne'ra nuro 37nɨwímearí̵ná re urɨgí̵awixɨnɨ, “Oxí̵ apɨxí̵ niaíwí̵ ní̵nɨ joxɨ nánɨ pí̵á yanɨro yarɨŋoɨ.” urí̵agí̵a 38o re urɨŋɨnigɨnɨ, “E nerɨ aiwɨ aŋí̵ wíyo nionɨ xwɨyí̵á ‘Gorɨxo píránɨŋí̵ seameŋweanɨ sɨŋánɨ imónɨnɨ aŋwɨ ayorɨnɨ.’ rarɨŋápɨ wáí̵ ourɨmemɨ nánɨ owaneyɨ. Xwɨyí̵á apɨ aŋí̵ amɨ amɨ áwaŋí̵ urɨmɨnɨrɨ bɨŋárɨnɨ.” nurɨrɨ 39Gariri pɨropenɨsí̵yo amɨ amɨ nemerí̵ná wigí̵ rotu' aŋí̵ iwiwámɨ nɨpáwiemerɨ wáí̵ urɨrɨ ámá imí̵ó sayá nɨmerɨ xɨxe'roarɨŋí̵ tí̵ŋí̵yo mɨxí̵ umáɨnowárɨrɨ nerɨ e emeŋɨnigɨnɨ.

Peyɨyí̵ tí̵ŋí̵ womɨ naŋí̵ imɨxɨŋí̵ nánɨrɨnɨ.

40Ámá peyɨyí̵ —Sɨmɨxí̵ apɨ ámá sɨŋwí̵ nɨwɨnɨrí̵ná neaxí̵meanɨgɨnɨrɨ e'í̵ yarɨgí̵ápɨrɨnɨ. Sɨmɨxí̵ ayí̵ tí̵ŋí̵ wo, Jisaso emearí̵ná, omɨ nɨwímearɨ sí̵mɨmaŋí̵mɨnɨ xómɨŋí̵ nɨyɨkwirɨ wauní̵ rɨxɨŋí̵ nurɨrɨ re urɨŋɨnigɨnɨ, “Joxɨ nɨsimónɨrí̵náyí̵, ananɨ píránɨŋí̵ nimɨxɨpaxí̵rɨnɨ.” urí̵agɨ 41o wá nɨwianɨrɨ we' í̵eapá nɨwirɨ omɨ seáyɨ e nɨwikwiárɨrɨ re urɨŋɨnigɨnɨ, “ ‘Nionɨ joxɨ naŋí̵ oimónɨnɨ.’ nimónarɨnɨ. Rɨxa naŋí̵ imóneɨ.” uráná re eŋɨnigɨnɨ. 42Peyɨyí̵ rɨxa axíná yí̵moŋɨnigɨnɨ. 43Rɨxa apaxí̵ me' yí̵móagɨ Jisaso apaxí̵pánɨŋí̵ imónɨgí̵áwa tí̵ŋí̵ e nánɨ nurowárɨrí̵ná arí̵á jɨyikí̵ norɨ 44re urɨŋɨnigɨnɨ, “Naŋí̵ simɨxí̵áyí̵ nánɨ amíná nurɨ ámáyo áwaŋí̵ murɨpanɨ.” nurɨrɨ ámá o wigí̵ yarɨgí̵ápɨ me' ámáyo xewanɨŋo áwaŋí̵ nura emenɨgɨnɨrɨ e nurɨrɨ ámɨ re urɨŋɨnigɨnɨ, “Amíná apaxí̵pánɨŋí̵ imónɨgí̵áwa tí̵ŋí̵ e nánɨ nurɨ womɨ sɨwá nɨwinɨrɨ naŋwí̵ rɨdɨyowá nánɨ negí̵ arí̵o Moseso eŋíná ŋwí̵ ikaxí̵ nearagí̵yí̵ bɨ rɨdɨyowá siárirɨ joxɨ naŋí̵ imóní̵í̵yí̵ nánɨ áwaŋí̵ rɨrɨ enɨ mɨnɨ wíɨrɨxɨnɨ.” urí̵agɨ aiwɨ 45o Jisasomɨ pí̵nɨ nɨwiárɨmɨ nurí̵ná arí̵kí áwaŋí̵ rɨmeŋɨnigɨnɨ. E e'agɨ nánɨ Jisaso ámá arí̵kí upupí̵gí̵ nipí̵rɨxɨnɨrɨ aŋí̵ bɨ bimɨ nurí̵ná sɨŋánɨ mɨre'mopaxí̵ nɨwimónɨrɨ nánɨ ámá mayí̵ e ŋweaŋáná ámá amɨ amɨ dánɨ o tí̵ŋí̵ e nánɨ bagí̵árɨnɨ.